اوشاقلارين سؤزه باخماماغي والدينين مهم مسأله‌لريندن ساييلير. اوشاق روانشناسلاري‌نين نظرينجه، ظاهرده كؤنزليك كيمي گؤرونن رفتارلارين هاميسي‌دا چتين مسأله ساييلمير.

اوشاقلارين مختلف بؤيومه زمانلاريني تانيماق، اونلارين عمل‌لريني داها ياخشي تانيماغا سبب اولار. حقيقتده اوشاغين سؤزه باخماماغيني هر ياشدا كؤنزليك آدلانديرماق اولماز. اريكسون روانشناسليق نظريه‌سينه گؤره، ايكي ياشلا اوچ ياش آراسي، اوشاقلارين مستقل اولماق زمانلاريدير. بو ياشلاردا اوشاق سرعتله بويوير و بو فعاليتلر اوشاغين قدرت نشانه‌سي ساييلير. بو اوزدن اوشاق استقلال و خود مختارليق داليسيجا اولور.

اوشاغين بو ياشداكي گوجلري اونو خودمختارليق رفتارلاري بروزا وئرمگه سوق وئرر. مثلاً اؤز اطرافيني آختارار، آتيليب دوشر، نئچه آدديم آتار و نئچه كلمه سؤز دانيشار. بو اوزدن بو ياشداكي اوشاقلاردا خودمختارليق و هويّت آختارماق لاپ يوخاري حدّينه چاتار و اونلاردا كؤنزليك كاملا طبيعيدير. مگر غير طبيعي حالدا باش وئره.

بعضاً بؤيوكلر اوشاقلارين قورخماسيني كؤنزليكله سهو ساليرلار. آما نظرده آلماق لازمدير كي اوشاقلار دا بؤيوكلره تاي قورخدوقلاري يئردن قاچارلار و اورا ياخينلاشماقدان چكينرلر.

اوشاقلارين ذاتي خصوصيّتلري اونلاري كؤنزليگينده ده تأثيرليدير. بعضي اوشاقلار او بيريلره نسبت داها چوخ داعواچيل اولورلار. بو اوشاقلار دوغوم آنيندان قرارسيز اولورلار و بير بالاجا محرّكين قارشيسيندا آرامليق حاليندان جيغان ويغانليغا چاتيرلار. آما ذاتي تفاوتلره رغماً اوشاقلارين كؤنزليگي داها چوخ تربيته باغليدير و چوخ آز ژنيتيكه مربوط اولور. ائله بونا گؤره تربيت يوللاري و اطراف عامل‌لري كنترل ائله‌مكله بو مشكلين قاباغيني آلماق اولار.

كؤنز اولشاقلارين علامتلري هانسيلاردير؟

1ـ تئز حرصلنيرلر.

2ـ بؤيوكلره جواب قايتاريرلار.

3ـ بؤيوكلرين ايستكلريه قاباغيندا فعال شكلده دايانيرلار و قانونلارا بويون وئرميرلر.

4ـ آيريلارين اينجيتمك اوچون عمداً بعضي ايشلر گؤرورلر.

5ـ اؤز رفتار و سهولرينه گؤره اؤزگه‌ني دانليرلار.

6ـ تئز انيجييَنديلر و اطرافداكيلاردان تئز ـ تئز كوسرلر.

7ـ حرصلي و غضبليديلر.

8ـ كينه‌لي و انتقام آلانديلار.

دئديكلريمه اساساً دوزگون تربيت، اوشاقلارين كؤنزليگيني آزالدا بيلر و سيز والدين اوشاقلارين سؤزه باخماماق و كؤنزليكلريني بير سئري تكنيكلرله آرادان آپارا بيلرسيز:

•  اوشاغيزا آرتيق محبت ائله‌يين. اوشاقلار بعضاً دقت مركزينده اولماق اوچون غير سالم رفتارلارا ال وورورلار. 

•  اوشاقلارا اؤزلرين آراملاتماغي اؤيرَدين. اوشاقلار و مخصوصاً كؤنز اوشاقلار تئز ـ تئز قرارسيزلاشارلار. اونلاري بير اويونجاغا و يا ايستي پتويا دلبسته ائله‌مكله، اؤزونو نئجه آراملاتماغي اونا اؤيرده بيلرسيز.

•  اوشاغين ياخشي ايشلريني يادا سالين.  هر رفتاري دقّت مركزينده ساخلاماق اونون دواملي اولماسينا سبب اولدوغونا گؤره نه ياخشي كي اوشاغين پيس عمل‌لري‌نين يئرينه ياخشي رفتارلاينا دقّت ائده‌سيز. هر بير نا صحيح رفتارا دقت يئتيرمه‌مكله اونون آرادان گئتمه‌سينه سبب اولا بيلرسيز.

•  والدينين رفتاري قاباقجادان بللي اولماليدير. اوشاغين بللي رفتاري قاباغيندا آتا ـ آنانين ثابت عكس العملي اولماسا اوشاق گيج قالار. مثلاً اوشاغين بير پيس رفتاري قاباغيندا بير دفعه گولمك و بير آيري دفعه حرصلنمك اونو گيج قويار.

والدينين رفتارلاري‌نين هماهنگ اولماسي‌دا اونلارين عكس‌العمل‌لري‌نين قاباقجادان بللي اولماسي قدر اهميّتليدير. آتا ـ آنانين عكس‌العمل‌لري‌نين نا هماهنگ اولماسي اوشاغين كؤنزليگينه سبب اولا بيلر.

•  اوشاغا امر وئرمك يئرينه خواهش ائله‌مگي اؤيرَدين. اوشاقلار چوخ تئز اؤيرَنرلر و والدينين رفتاريندان اولگو گؤتوررلر. اونلارين يانيندا ادبلي و معرفتلي دانيشماغين چوخ يوخاري تأثيري وار.

اوشاقلارا امر وئرمك يئرينه اولاردان اقتدارلا خواهش ائله‌سز اوندان امر وئرمك يئرينه خواهش ائله‌مگي‌ده گؤزله‌يه‌ بيلرسيز.

• اوشاقلارا همكارليغي و مسئوليت قبول ائله‌مگي اؤيرَدين. بو ايش اوچون مختلف ياشلاردا اونلارا مناسب مسئوليت تاپيشيرين.

جبران ائله‌مگين لازمليگي، بعضي ايشلرين جبران اولماق قابليّتي‌نين اولماماغيني و رفتارلارين عيني نتيجه‌سيني اونلارا اؤيرتمك، اونلاري مسئوليّتلي و همكارليق روحيّه‌سينه مالك بير اوشاق ائلر.

اونلارا بو مضموندا ناغيل‌لار تعريفله‌مك‌ده فايداليدير آما اونلاري، ياشلارينا مناسب فعاليّتده شركت وئرمگين داها آرتيق تأثيري وار.

قايناق : دين خادمي